Нишасти матбуотӣ

- Дар давоми шаш моҳи соли 2025 қисми даромади буҷети давлатӣ 106,4 фоиз иҷро гардида, ба ҷои нақшаи 225780,0 ҳазор сомонӣ, воридот 368446,0 ҳазор сомониро ташкил дод, ки нисбат ба нақшаи пешбинишуда 22191,0 ҳазор сомонӣ зиёд мебошад.

     Ба ҳолати 1 июли соли 2025 ҳаҷми умумии истеҳсоли маҳсулоти соҳа дар ҳамаи шаклҳои хоҷагидорӣ ба 1729,5 миллион сомонӣ баробар гардид, ки нисбат ба ҳамин давраи соли гузашта 114,3 фоиз мебошад, - гуфт зимни нишасти матбуотӣ ба рӯзноманигорон муовини якуми раиси ноҳияи Бобоҷон Ғафуров Абдуаҳад Ҳакимзода.

   Дар нимсолаи якуми соли 2025 аз ҷониби корхонаҳои саноатии ноҳия ба маблағи 1771,0  миллион сомонӣ маҳсулоти саноатӣ истеҳсол карда шуд ва суръати афзоиш 91,9 фоизро ташкил дод. Дар лавраи ҳисоботӣ аз 210 корхонаи истеҳсолӣ 187 корхона фаъолият намуда, 137 корхона ҳаҷми истеҳсоли маҳсулотро нисбат ба ҳамин давраи соли 2024 зиёд намуда, 50 корхона суръати афзоишро коҳиш доданд. Инчунин 23 корхона аз сабаби набудани фармоишгар, набудани маблағи гардиш, дигар кардани самти фаъолият ва ба фурӯш нарафтани маҳсулот, фаъолият накарданд. Дар нимсолаи якуми соли 2025 дар ноҳия 16 корхонаҳои саноатии нав ва хатҳои иловагӣ аз тарафи соҳибкорон ба истифода дода шуд, ки дар натиҷа 150 ҷойҳои нави корӣ таъсис дода шуданд. 

    Бо мақсади оқилона ва самаранок истифода бурдани замин, афзун намудани ҳаҷми истеҳсоли маҳсулоти кишоварзӣ соли равон, тибқи дурнамо, дар хоҷагиҳои кишоварзӣ гузаронидани кишти зироатҳо дар майдони 24371гектар, ки аз он 20239 гектар дар заминҳои обӣ мебошад, пешбинӣ шудааст.

    Дар идома оид ба вазъи саноат ва энергетика, соҳаи сохтмон ва меъморӣ, соҳибкорӣ ва сармоягузорӣ, илму маориф, тандурустӣ, кор бо занон ва оила, фарҳанг, ҷавонон ва варзиш, меҳнат, шуғл ва муҳоҷирати меҳнатӣ, риояи Қонуни Ҷумҳурии Тоҷикистон “Дар бораи танзими анъана ва ҷашну маросим дар Ҷумҳурии Тоҷикистон”, баррасии арзу шикоятҳои шаҳрвандон ва дигар масъалаҳои марбута фишурдаи маълумот тариқи варақаи иттилоотӣ ба кормандони воситаҳои ахбори омма пешниҳод гардид.

    Дар рафти нишасти матбуотӣ рӯзноманигорон оид ба масъалаҳои фаъолияти бозорҳои назди марзӣ, ҳалли муроҷиати шаҳрвандон, аз фаъолият бозмондани бархе аз корхонаҳои саноатӣ, таъсиси корхонаҳои коркарди меваҷот, мумфаршкунии роҳ, фаъолияти радиои “Замон”, гармшавии ҳаво ва таъсири ба соҳаи кишоварзӣ, бекоршавии қарор,  сохтмони хонаҳои истиқоматӣ дар маҳаллаи “Наврӯз”-и ҷамоати деҳоти Ёва, истиқомати ҷӯгиҳо дар ҳудуди ноҳия, ба таҳсил фаро гирифтани фарзандони онҳо ва дигар масоили умда, суолҳо дода, ҷавобҳои мушаххас гирифтанд.

    Дар нишасти матбуотӣ баробари намояндагони сохторҳои мухталифи ноҳия намояндаи Мақомоти иҷроияи ҳокимияти давлатии вилояти Суғд Шарифҷон Ахмедов низ иштирок намуд.

Хабарнигори “Парвозгоҳи бузургон”

   Вақте сухан дар бораи мубориза бо коррупсия меравад, аксаран таваҷҷуҳ ба фаъолияти мақомоти давлатӣ ва ниҳодҳои ҳифзи ҳуқуқ равона мегардад. Бешубҳа, нақши онҳо калидӣ аст, аммо дар паси ҳар як қонун ва стратегия як қувваи азимтар ва муассиртаре истодааст, ки метавонад тағйироти бунёдӣ ба вуҷуд орад: ин ҷомеаи шаҳрвандӣ мебошад. Дар Тоҷикистон низ фаъолияти ҷомеаи шаҳрвандӣ дар ин самт аҳамияти рӯзафзун пайдо кардааст.

     Коррупсия на танҳо як ҷинояти иқтисодӣ, балки бемории иҷтимоист, ки ба тамомияти давлат, адолати иҷтимоӣ ва рушди устувор осеб мерасонад. Ин падидаи номатлуб эътимоди мардумро ба мақомоти давлатӣ коҳиш медиҳад, сармоягузориро метарсонад ва дар ниҳоят ба фалаҷ шудани низоми идоракунӣ оварда мерасонад. Аз ин рӯ, мубориза бо он набояд танҳо ба дӯши давлат афтад, балки бояд  кори умумӣ ва дастаҷамъона бояд бошад. Маҳз дар ҳамин ҷо нақши ҷомеаи шаҳрвандӣ ҳамчун шарики муҳим ва ногузир ба миён меояд.

    Ҷомеаи шаҳрвандӣ, ки иттиҳодияҳои ҷамъиятӣ, созмонҳои ғайриҳукуматӣ, расонаҳои мустақил, олимон, фаъолон ва шаҳрвандони одиро дар бар мегирад, дорои иқтидори бузург дар чанд самти асосии мубориза бо коррупсия шуда метавонад:

1. Баланд бардоштани маънавиёт: Яке аз роҳҳои муассиртарини пешгирии коррупсия ин баланд бардоштани маърифати ҳуқуқии шаҳрвандон аст. Ҷомеаи шаҳрвандӣ метавонад тавассути барномаҳои таълимӣ, семинарҳо, нашрияҳо ва маъракаҳои иттилоотӣ мардумро аз хатарҳои коррупсия ва ҳуқуқҳои онҳо дар мубориза бо ин падида огоҳ созад.
2. Тарғибу ташвиқ ва ташаккули афкори оштинопазир: Нақши расонаҳо ва фаъолони ҷомеаи шаҳрвандӣ дар ташаккули афкори оштинопазир нисбат ба коррупсия бениҳоят муҳим аст. Баҳсҳои оммавӣ, мақолаҳои таҳлилӣ, барномаҳои телевизионӣ ва радиоӣ метавонанд мавзуи коррупсияро доимо дар меҳвари таваҷҷуҳи ҷомеа нигоҳ дошта, ба ин падида нафрати иҷтимоӣ эҷод кунанд.
3. Ҳимояи қурбониёни коррупсия ва шоҳидон: Коррупсия на танҳо ҷомеаро заиф мекунад, балки ба шахсони алоҳида низ зарар мерасонад. Созмонҳои ҷомеаи шаҳрвандӣ метавонанд ба қурбониёни коррупсия ё шоҳидоне, ки далелҳои коррупсиониро пешниҳод мекунанд, дастгирии ҳуқуқӣ ва иҷтимоӣ расонанд. Ин муҳим аст, зеро бисёре аз шаҳрвандон аз тарси таъқиб ва интиқом аз ифшои иттилоот худдорӣ мекунанд.
4. Таҳияи тавсияҳо ва лоиҳаҳои қонун: Созмонҳои ҷомеаи шаҳрвандӣ, ки дар самти мубориза бо коррупсия таҷриба доранд, метавонанд ба мақомоти давлатӣ дар таҳияи қонунҳо ва стратегияҳои муассир оид ба мубориза бо коррупсия тавсияҳо пешниҳод кунанд.

   Давлати Тоҷикистон аҳамияти нақши ҷомеаи шаҳрвандиро дарк мекунад. Дар “Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030” ба тақвияти низоми ҳамоҳангсозии мақомоти давлатӣ ва ҷомеаи шаҳрвандӣ дар муқовимат ба коррупсия диққати махсус дода шудааст. Гуруҳи тарғиботии назди Мақомоти иҷроияи ҳокимияти давлатии шаҳру ноҳияҳо низ бо ҷалби ходимони дин ва фаъолон корҳои иттилоотию маърифатиро ба роҳ мондааст, ки ин намунаи возеҳи ҳамкории давлат ва ҷомеаи шаҳрвандӣ дар ин самт мебошад.

    Дар ниҳоят, мубориза бо коррупсия танҳо он вақт самарабахш мегардад, ки агар ҳар як фарди ҷомеа зидди ин падидаи номатлуб бошад. Ин маънои онро дорад, ки мо бояд ба ташаккули ҷаҳонбинии зиддикоррупсионӣ аз кӯдакӣ шуруъ кунем, арзишҳои ахлоқӣ ва поквиҷидониро тарғиб намоем ва ба ҳар гуна зуҳуроти фасод тоқатнопазир бошем. Ҷомеаи шаҳрвандӣ дар ин раванд метавонад ҳамчун ташаббускор ва такондиҳандаи асосӣ хидмат кунад.

Зулола Ибрагимова, сартабиби сохтори бистаринамоии ноҳияи Бобоҷон Ғафуров

      Дар идомаи силсилаи мулоқотҳои тарғиботӣ таҳти усули "Маҳалла ба маҳалла", дирӯз аъзоёни гурӯҳи корӣ бо сокинони кӯчаи ба номи Файзиев дар ҷамоати шаҳраки Ғафуров вохӯрданд. Ин мулоқот, ки ба хотири баланд бардоштани маърифати сиёсӣ ва ҳуқуқии шаҳрвандон баргузор шуд, масъалаҳои муҳими иҷтимоиро дар бар гирифт. Дар рафти суханрониҳо, аъзоёни гурӯҳи корӣ ба чанд нуқтаи калидӣ таваҷҷуҳ зоҳир намуданд, ки ҳар яке дорои аҳамияти хос барои ҷомеа мебошад: роҷеъ ба масъалаи ҳифзи манфиатҳои миллӣ ва баланд бардоштани маърифати сиёсӣ, таъкид гардид, ки ҳар як шаҳрванд бояд аз ҳуқуқу ӯҳдадориҳои худ огоҳ бошад ва дар ҳифзи манфиатҳои миллӣ саҳми фаъолона гузорад. Риояи Қонуни Ҷумҳурии Тоҷикистон "Дар бораи танзими ҷашну маросим дар Ҷумҳурии Тоҷикистон"низ аз масоили меҳварӣ маҳсуб ёфта, аъзоён аз сокинон даъват ба амал оварданд, ки ба муқаррароти ин қонун риоя кунанд. Мақсад аз ин тавсия пешгирии исрофкорӣ ва нигоҳ доштани суннатҳои неки миллӣ дар чаҳорчӯби қонун мебошад. Инчунин масъалаи шомилшавӣ ба ҳизбу ҳаракатҳои экстремистӣ ва пешгирӣ аз ин нерӯи хатарзо баррасӣ гардиданд. Масъулин хатари гурӯҳҳои ифротгароро тавзеҳ дода, аҳолиро ҳушдор доданд, ки аз таъсири онҳо эмин бошанд. Ин масъала яке аз мубрамтарин мавзуъҳои имрӯза буда, ба амнияти миллӣ ва сулҳу субот дар ҷомеа дахл дорад. Хизмат дар сафи Қувваҳои Мусаллаҳ низ ҳамчун рисолати шаҳрвандӣ маънидод шуда, муҳимияти он барои ҳифзи амнияти кишвар таъкид гардид. Истифодаи босамари неруи барқ ва замин аз масъалаи муҳими саривақтӣ буданд, ки дар мулоқот имрӯза баррасӣ шуданд. Барои сарфакорӣ дар истифодаи захираҳо, бахусус неруи барқ ва заминҳои наздиҳавлигӣ, тавсияҳо дода шуд.

     Боиси тазаккур аст, ки вохӯриҳо ба ин усул, имкон медиҳанд, ки масъалаҳои муҳим ва мубрами рӯз мустақиман бо аҳолӣ муҳокима шаванд. Ин равиш на танҳо ба баланд бардоштани огоҳии ҷомеа мусоидат мекунад, балки боиси таҳкими робитаи байни мақомот ва аҳолӣ мегардад. Ин иқдом нишон медиҳад, ки мақомоти дахлдор ба масъалаҳои иҷтимоӣ ва маърифатии аҳолӣ таваҷҷуҳи ҷиддӣ доранд ва кӯшиш мекунанд, ки тавассути муколамаи мустақим мушкилоти мавҷударо бартараф созанд.

Хабарнигори “Парвозгоҳи бузурон”

    Дирӯз дар доираи ташаббуси "Деҳа ба деҳа" як қатор масъулини ноҳия бо сокинони маҳаллаи "Тоҷикистон-2"-и ҷамоати деҳоти Хистеварз мулоқот намуданд. Ҳадаф аз ин мулоқот баланд бардоштани маърифати ҳуқуқӣ ва сиёсии шаҳрвандон ва муҳокимаи масъалаҳои муҳими иҷтимоӣ буд.

Дар ин вохӯрӣ Темиров Улуғбек, мудири шуъбаи танзими ҷашну маросими МИҲД-и ноҳия, Абдуллоев Соҳибҷон, мудири шуъбаи ҷавонони КИ ҲХДТ дар ноҳияи Бобоҷон Ғафуров, Қодирова Машҳура, сармутахассиси шӯъбаи кор бо занон ва оилаи назди МИҲД-и ноҳия, Ҷӯраева Мавлуда, сармутахассиси шуъбаи рушди иҷтимоӣ ва робита бо ҷомеаи МИҲД-и ноҳия, Искандаров Фирӯз, сардори Раёсати агентии меҳнат ва шуғли аҳолӣ дар ноҳия ва Ҷӯрабоева Матлуба, муовини раиси ҷамоати деҳоти Хистеварз иштирок ва суханронӣ намуданд.

Аъзоёни гурӯҳи корӣ зимни суханрониҳои худ ба як қатор масъалаҳои муҳим таваҷҷуҳ зоҳир намуданд:

• Ҳифзи манфиатҳои миллӣ ва баланд бардоштани маърифати сиёсӣ: Таъкид шуд, ки ҳар як шаҳрванд бояд аз ҳуқуқу уҳдадориҳои худ огоҳ бошад ва дар ҳифзи манфиатҳои миллӣ саҳмгузор бошад.
• Риояи қонуни ҶТ "Дар бораи танзими ҷашну маросим дар ҶТ": Аз сокинон даъват карда шуд, ки ба муқаррароти ин қонун риоя кунанд, то аз исрофкорӣ ҷилавгирӣ шавад.
• Пешгирии шомилшавӣ ба ҳизбу ҳаракатҳои экстремистӣ: Масъулин хатари гурӯҳҳои ифротгароро шарҳ дода, аҳолиро ҳушдор доданд, ки аз таъсири онҳо эмин бошанд.
• Хизмат дар сафи Қувваҳои Мусаллаҳ: Ин вазифа ҳамчун рисолати шаҳрвандӣ маънидод шуда, муҳимияти он барои ҳифзи амнияти кишвар таъкид гардид.
• Мубориза бо хурофот: Аз сокинон хоҳиш карда шуд, ки ба ақидаҳои хурофотӣ бовар накунанд ва ба илму дониш такя намоянд.
• Истифодаи босамари неруи барқ ва замин: Барои сарфакорӣ дар истифодаи захираҳо, бахусус неруи барқ ва заминҳои наздиҳавлигӣ, тавсияҳо дода шуд.

Дар интиҳои мулоқот, сокинон имкон пайдо карданд, ки саволҳои худро оид ба масъалаҳои муҳими маҳалла мустақиман ба масъулин пешниҳод кунанд. Ба ҳамаи дархостҳо ва саволҳо ҷавобҳои мушаххас дода шуд. Чунин вохӯриҳо ба таҳкими робитаи байни мақомот ва аҳолӣ мусоидат намуда, ба ҳалли мушкилоти ҷойдошта кӯмак мерасонанд. Чунин вохӯрӣ дар дигар деҳаҳои ҷамоати деҳоти Хистеварз идома дорад.

                                                                                                                                                                        Хабарнигори “Парвозгоҳи бузургон”