Ба ифтихори Рӯзи варзишгарон дар маҷмааи варзишии ҷамоати деҳоти Исфисор бо доираи васеи варзишгарон чорабинии бушукуҳ баргузор гардид.

    Ҳамаи иштирокчиёни ин ҳамоишро Дилором Турсунзода, муовини раиси ноҳияи Бобоҷон Ғафуров, аз номи Мақомоти иҷроияи ҳокимияти давлатии ноҳияи Бобоҷон Ғафуров, бо Рӯзи варзишгарон муборакбод намуда, афзуд, ки тарбияи инсони солим аз қадимулайём байни нигони мо вазифаи аввалин ҳисобида мешуд. Таҳти роҳбарӣ ва сиёсати хирадмандонаи Пешвои миллат муҳтарам Эмомалӣ Раҳмон варзиш ҳамчун омили ташаккули инсони баркамол дар ҳаёти ҷамъиятӣ, мақоми хоса пайдо намуда, бозиҳои миллӣ аз нав эҳё мегарданд. Дар ин раванд дар мақомоти маҳаллии ҳокимияти давлатӣ бо иқдоми Раиси вилояти Суғд муҳтарам Раҷаб Аҳмадзода, ба рушди ҳамаҷонибаи соҳаи варзиш ва тарбияи ҷисмонӣ, бунёди майдончаҳои варзишӣ ва фароҳам овардани шароити мусоид солимиву бардамии инсон таваҷҷуҳи махсус дода шудааст.

    Имрӯз варзиш ҳамчун як рукни миллӣ ба ҳаёти сиёсиву ҷамъиятӣ ва фарҳангии мо ворид гардида, бешубҳа дар радифи дастовардҳои истиқлолияти ватани азизамон мақоми хоса касб кардааст. Бо иқдоми Ҳукумати мамлакат ҷиҳати таъмини шароити муосир барои рушди тарбияи ҷисмонӣ тавассути маблағгузориҳои буҷети давлатӣ ва шахсони воқеиву ҳуқуқӣ бунёди марказҳои варзишиву маданӣ ҳамасола зиёд гардида истодааст.

    Дар ноҳия 2 мактаби варзишӣ, 5 варзишгоҳҳо, зиёда аз 160 майдончаҳои варзишӣ, 2 ҳавзи шиноварӣ фаъолият дорад. Дар мактабҳои варзишии ноҳия зиёда аз ҳазор нафар ҷавонону наврасон ҳамарӯза ба машқу тамрин ва варзиши касбӣ фаро гирифта мешаванд.

    Дар идомаи чорабинӣ, мураббиёну собиқадорони соҳаи варзиш ва варзишгарони наврасу ҷавон бо Сипоснома ва туҳфаҳои хотиравии Мақомоти иҷроияи ҳокимияти давлатии ноҳияи Бобоҷон Ғафуров қадрдонӣ шуданд.

Чорбинӣ бо барномаи фарҳангӣ хубу хотирмон анҷом пазируфт.

“Парвозгоҳи бузургон”            

       Боздиди корӣ аз мактабҳои вилояти Суғд ва омодагии онҳо ба соли нави таҳсил дар мадди назари муовини Сарвазири Ҷумҳурии Тоҷикистон Дилрабо Мансурӣ қарор гирифт. Ӯ дар доираи ин сафари корӣ аз Муассисаи таҳсилоти миёнаи умумии №15-и ноҳияи Бобоҷон Ғафуров боздид намуд. Мақсад аз ин сафар шиносоӣ бо шароити таълиму тадрис, омодагии синфхонаҳо ва биноҳои таълимӣ барои соли таҳсили 2025-2026 буд. Дар ин боздид муовини вазири маориф ва илм Равшан Каримзода, муовини раиси вилояти Суғд Ҷамшед Ҷӯразода ва дигар шахсони масъул муовини сарвазирро ҳамроҳӣ намуданд. Ҳайати меҳмонон аз фаъолияти мактаб, вазъи омодагӣ ба давраи тирамоҳу зимистон, шароити таълиму тарбия, ҷобаҷогузории омӯзгорон ва ҷойи нишасти хонандагон шинос шуданд. Маълум гардид, ки ин муассисаи таълимӣ таъмири ҷорӣ шуда, ба соли таҳсили нав пурра омода аст. Дар ҷараёни ин боздид Дилрабо Мансурӣ ба масъулони соҳа дастурҳое дод, ки ба беҳтар намудани шароити таълим, рушди фанҳои дақиқ, баланд бардоштани сифати таълим, ҷалби бештари хонандагон ба озмунҳо ва олимпиадаҳои ҷумҳуриявӣ ва байналмилалӣ ва тақвияти заминаи моддию техникӣ равона шудаанд. Ӯ ҳамчунин ба фароҳам овардани муҳити солим барои хонандагон таваҷҷуҳи махсус зоҳир намуд.

Боздиди муовини Сарвазир аз ин муассисаи таълимӣ нишон медиҳад, ки мақомоти давлатӣ ба омодагии мактабҳо барои соли нави таҳсил ва фароҳам овардани шароити беҳтарин барои хонандагон таваҷҷуҳи ҷиддӣ доранд.

«Парвозгоҳи бузургон»

         Ноҳияи Бобоҷон Ғафуров - яке аз минтақаҳои пешсаф дар парвариш ва истеҳсоли сабзавоти хушсифат ба шумор меравад. Раиси вилояти Суғд Раҷаб Аҳмадзода зимни сафари корӣ бо фаъолияти хоҷагии деҳқонии “Қалъача”, ки дар ҳудуди ноҳия фаъолият мебарад, аз наздик шинос гардид.

   Хоҷагии мазкур дорои 2 гектар замини корам буда, асосан ба кишту парвариши помидор ва бодиринги навъҳои серҳосил машғул аст. Ба гуфтаи масъулин, тайи беш аз 15 сол аст, ки онҳо бо парвариши навъи беҳамтои помидор - “Дили армуғонӣ” машғуланд, ки дар бозорҳои дохилии кишвар талабгори зиёд дошта, бо тамъу лаззати хосаш шӯҳрати вижа пайдо кардааст. Риояи қатъии қоидаҳои агротехникӣ, истифодаи обу ғизодиҳии муназзам ва таҷрибаи ғании деҳқонон боиси фаровонҳосилии ин навъи маҳсулот гардидааст.

  Дар ҳақиқат, соҳаи кишоварзӣ бо пуштибонӣ ва ғамхориҳои пайвастаи Пешвои миллат муҳтарам Эмомалӣ Раҳмон рӯз ба рӯз тараққӣ карда, деҳқонони меҳнатқарин дар тамоми гӯшаву канори вилоят барои ба даст овардани ҳосили баланд ва ғанӣ гардондани бозорҳои мамлакат бо маҳсулоти ватании хушсифат кӯшиш ба харҷ медиҳанд.

   Чунин талошҳо на танҳо ба таъмини амнияти озуқавории мамлакат мусоидат мекунанд, балки дар пешбурди иқтисодиёти миллӣ, фароҳам овардани ҷойҳои нави корӣ ва баланд бардоштани сатҳи зиндагии аҳолӣ нақши муҳим доранд.

Раиси вилоят ба фаъолияти деҳқонон баҳои баланд дода, барои истифодаи самараноки замин ва зиёд намудани ҳаҷми истеҳсоли маҳсулот тавсияҳо дод.

Хадамоти матбуоти Раиси вилояти Суғд

Шиносоии Раиси вилояти Суғд бо ҷараёни бунёдкориҳо дар ноҳияи Бобоҷон Ғафуров

      Раиси вилояти Суғд Раҷаб Аҳмадзода дар доираи сафари корӣ ба ноҳияи Бобоҷон Ғафуров аз раванди корҳои сохтмонӣ ва ободонӣ бахшида ба истиқболи 35-солагии Истиқлолияти давлатии Ҷумҳурии Тоҷикистон боздид ба амал овард. Зимни боздид аз рафти корҳои навсозӣ дар бинои Қасри фарҳанги Ҷамоати деҳоти ба номи Дадобой Холматов иттилоъ дода шуд, ки иншооти мазкур бо иқдоми мақомоти иҷроияи маҳаллӣ аз навсозӣ ва обод карда мешавад. Фармоишгари иншоот Идораи сохтмони асосии мақомоти иҷроияи ҳокимияти давлатии ноҳияи Бобоҷон Ғафуров мебошад. 

    Раиси вилоят ҷиҳати сари вақт ва бо сифати баланд ба анҷом расонидани корҳои сохтмонӣ ба масъулин дастуру супоришҳои мушаххас дод. Ҳамчунин дар доираи сафар Раиси вилоят бо фаъолияти ҶДММ “Хубҷам Инвест” — яке аз корхонаҳои муваффақи саноатии вилоят шинос шуд. Масъулини ширкат иттилоъ доданд, ки дар назар аст, ду сехи нави истеҳсолӣ — сехи истеҳсоли равған аз тухми офтобпараст ва сехи резиши равған мавриди истифода қарор гиранд.

    Иқтидори истеҳсолии сехи равған дар як шабонарӯз 200 тонна муайян гардида, бо ба фаъолият шурӯъ кардани ин ду сехи саноатӣ, беш аз 60 нафар сокинони маҳаллӣ бо ҷойи кор ва маоши хуб таъмин хоҳанд шуд. Ин иқдом боз як қадами устувор дар роҳи саноатикунонии босуръати ноҳия арзёбӣ мегардад.

Хадамоти матбуоти
Раиси вилояти Суғд