Рӯзи нақлиётчиён

     25 - уми июл дар кишвар Рӯзи кормандони касбии соҳаи нақлиёт таҷлил гардид. Ба ин муносибат дар Мақомоти иҷроияи ҳокимияти давлатии ноҳияи Бобоҷон Ғафуров ҷаласаи тантанавӣ баргузор шуд, ки дар он нақши муҳими ин соҳа дар рушди иқтисодӣ ва иҷтимоии кишвар таъкид шуд.

   Ҷаласаро муовини раиси ноҳияи Бобоҷон Ғафуров, сарпарасти соҳа, Фирдавс Абдуллозода ифтитоҳ намуда, аз номи раиси ноҳия Нусратулло Салимзода тамоми масъулони вобастаи соҳаи нақлиёт ва роҳбарони ширкатҳои нақлиёти мусофиркашонии ноҳияро бо иди касбиашон табрик гуфт.

   Дар суханронии худ Фирдавс Абдуллозода қайд кард, ки соҳаи нақлиёт яке аз самтҳои афзалиятноки хоҷагии халқ буда, рушди кулли соҳаҳо бо фаъолияти самараноки нақлиётчиён алоқаманд аст. Айни ҳол дар ҳудуди ноҳия 10 ширкати нақлиётӣ ба мардум хидмат мерасонанд. Аз ҷумла: ҶСК “Сайёр” (№328), ҶДММ “Чарх” (№55), Ютранс – компания (№90),“Аэлита” (№113),“Ронанда - 1” (№66),“Востоктранссервис” (№92), “Дархост” (№110, “Бобо Ӯлмас” (№92 “А”), Муҳаммад - транс” (№116), ҶСК “Сорбон” (№105) мебошад.

   Ҳамчунин, таъкид гардид, ки нақлиётчиёни ноҳия дар ҳаёти сиёсиву ҷамъиятӣ фаъолона ширкат варзида, бо бахши саноат ва нақлиёти ноҳия ҳамкории судманд доранд, ки ин ба пешрафти умумии минтақа мусоидат мекунад.

    Дар фарҷоми чорабинӣ ба нишони қадрдонии заҳматҳои ин қишри ҷомеа, ҳамаи роҳбарони ширкатҳои нақлиётӣ бо Сипосномаи Мақомоти иҷроияи ҳокимияти давлатии ноҳияи Бобоҷон Ғафуров сарфароз гардонида шуданд. Ин иқдом аз таваҷҷуҳи мақомоти иҷроия ба рушди соҳаи нақлиёт ва дастгирии кормандони он шаҳодат медиҳад.

Хабарнигори “Парвозгоҳи бузургон”

Дар ноҳияи Бобоҷон Ғафуров ба рушди минбаъдаи соҳаҳои гуногуни иқтисодиёт, ҷалби сармояҳои дохиливу хориҷӣ ва муҳайё намудани шароити мусоид ба рушди соҳибкорӣ тадбирҳои зарурӣ андешида шудаанд.

Дар шаш моҳи соли 2022 дар ноҳияи Бобоҷон Ғафуров 6 лоиҳаи сармоягузории давлатӣ амалӣ гардида, дар доираи онҳо маблағҳои зарурӣ азхуд карда шуданд. 

Ҳамзамон, бо иштироки шарикони рушд 5 лоиҳаи иҷтимоӣ ва инфрасохторӣ амалӣ шуда истодаанд, ки онҳо барои беҳтар кардани таъминоти хонандагон бо хўрока, таъминоти аҳолӣ бо оби нушокӣ, полезӣ ва беҳдошти ҳолати мелиоративии заминҳо мусоидат карда истодаанд. Ҳоло аз ҷониби мақомоти иҷроияи ҳокимияти давлатии ноҳия 9 лоиҳа ҷиҳати муаммоҳо дар самти иҷтимоиёт, инфрасохтор ва ҳолати беҳтар кардани вазъи обёрии заминҳои ҳудуди ноҳия таҳия ва бо мақсади дастгирии минбаъда ба Мақомоти иҷроияи ҳокимияти давлатии вилояти Суғд пешниҳод карда шудаанд.

     Ҳамзамон дар шаш моҳи соли ҷорӣ ба иқтисодиёти ноҳия  ба маблағи 700,0 ҳазор доллари ИМА сармояи мустақим ҷалб гардид, ки онҳо ба рушди иқтидори истеҳсолии корхонаҳо заминаи устувор  гузошта истодаанд.

    Дар давраи ҳисоботӣ аз ҷониби корхонаҳои саноатии ноҳия ба маблағи  зиёда аз 1,9 млрд. сомонӣ маҳсулоти саноатӣ истеҳсол карда шуд, ки нисбат ба ҳамин давраи соли соли 2021 ба ҳаҷми 555,5 млн. сомонӣ зиёд буда, суръати афзоиши маҳсулоти саноатӣ бо нархҳои муқоисавӣ ба 138,8 фоиз баробар аст.  

    Бо мақсади ноил шудан ба ҳадафи саноатикунонии кишвар тақвияти ҳамкорӣ бо соҳибкорони ватанию хориҷӣ ҷиҳати таъсиси корхонаҳои саноатӣ аз ҷониби масъулини мақомоти иҷроияи ҳокимияти давлатии ноҳия корбарӣ бо маром  идома дорад..

Боиси қайд аст, ки дар ноҳия Шўрои соҳибкорию сармоягузорӣ фаъолият дошта, моҳи феврали соли ҷорӣ ҷаласаи навбатии Шўро доир гардида, дар кори Шўро якчанд соҳибкорон сухан ронданд, ҷиҳати рушди минбаъдаи соҳаи саноати ноҳия таклифу пешниҳодашоро баён намуданд, ки  онҳо ҳоло мавриди баррасӣ қарор доранд.     

Мавриди иттиллоъ аст, ки дар соли 2022 дар ҳудуди ноҳия таъсиси 20 корхонаи хурду миёна пешбинӣ гардида, дар ин давра дар ноҳия 12 корхонаҳои саноатии нав ва хатҳои иловагии хурду миёнаи истеҳсолӣ таъсис дода шудаанд, ки дар натиҷа наздик 200 нафар шаҳрвандон бо ҷойи кории доимӣ таъмин гардиданд.

Дар баробари ин дар давраи ҳисоботӣ аз 136 корхонаҳои истеҳсолӣ, 106 адад фаъолият намуда, 69 корхонаи калони саноатӣ ҳаҷми истеҳсоли маҳсулотро нисбат ба ҳамин давраи соли гузашта афзун намуданд.

Дар ноҳия барои занон ҷиҳати фаъолияти соҳибкорию ҳунармандӣ шароити мусоид фароҳам оварда шудааст, аммо шумораи марказҳои таълимию истеҳсолӣ, ки мавҷуданд, кифоягӣ намекунанд. Ба ҳолати имрӯза дар қаламрави ноҳия ҳамагӣ 4 маркази таълимӣ-истеҳсолӣ фаъолият мебарад ва дар онҳо 12 дастгоҳ насб карда шудааст. Инчунин 9 корхонаи дўзандагӣ фаъолият дошта, дар онҳо асосан ба дӯхтани  либосҳои мактабӣ машғул буда, ин теъдоди коргоҳҳо барои занони ноҳия низ кам мебошад.

Ҳукумати Ҷумҳурии Тоҷикистон солҳои охир ҷиҳати рушди соҳибкорӣ, бахусус соҳибкории истеҳсолӣ, таваҷҷуҳи бештар зоҳир менамояд. Бахусус, аз ҷониби Пешвои муаззами миллат, муҳтарам Эмомалӣ Раҳмон эълон гардидани мораторий ба соҳибкории истеҳсолӣ саноатчиёни ноҳияро хеле рӯҳбаланд намуд ва ин дастгирии Сардори давлат имкон медиҳад, ки бештар корхонаҳои нави истеҳсолӣ таъсис ва ҷойҳои нави корӣ ташкил карда шавад. Дар амалигардонии занҷираи "ашёи хом-истеҳсоли маҳсулоти ниҳоӣ-бозори фурўш" бо мақсади рушди соҳаи саноат ва сиёсати мусоидат ба содирот ва воридотивазкунӣ корбарӣ намуда, дар давраи сипарии соли ҷорӣ аз ноҳия  ба маблағи  178,5 млн. доллари амрикоӣ маҳсулот содирот карда шуд. 

Абдуазиз САМАДЗОДА,

мудири шуъбаи

сармоягузорӣ ва амволи давлатии

Мақомоти иҷроияи ҳокимияти

давлатии ноҳияи Бобоҷон Ғафуров

        Бо мақсади шиносоӣ бо раванди нашъунамои пахта ва иҷрои корҳои агротехникӣ, дирӯз муовини якуми раиси ноҳия Абдуаҳад Ҳакимзода аз заминҳои Кооперативи тиҷоратӣ – хоҷагии ҷамоавии ба номи "Турсунбой Қӯшатов" дидан намуд. Ин боздид дар замоне сурат мегирад, ки кишоварзон дар марҳилаи ниҳоии парвариши пахта қарор доранд ва таваҷҷуҳи давлат ба ин бахши муҳими кишоварзӣ рӯз аз рӯз меафзояд.

  Тибқи иттилои Ориф Азаматов, раиси Кооперативи тиҷоратӣ - хоҷагии ҷамоавии “Турсунбой Қӯшатов”, соли равон дар хоҷагӣ дар масоҳати 726 гектар кишти пунбадона гузаронида шудааст. Айни ҳол, кишоварзон дар давраи ниҳоии иҷроиши корҳои агротехникӣ, яъне коркарди байни қаторҳо, тоза кардани алафҳои бегона, обёрӣ, ғизодиҳӣ ва ғизодиҳӣ аз барг қарор доранд. Ин корҳо барои инкишофи дуруст ва баланд бардоштани ҳосили пахта аҳамияти махсус доранд.

 - Барои баланд намудани ҳосилнокӣ кӯшиш намуда истодаем, аъзоён ва иҷоракорон азм доранд, ки ба ҳисоби миёна аз ҳосили имсола, аз ҳар гектар 26 – 27 сентнер пахта ба даст оваранд, -гуфт, Ориф Азаматов.

   Метавон зикр дошт, ки ин рақам аз нақшаҳои ҷиддӣ ва умедбахши хоҷагӣ шаҳодат медиҳад. Барои расидан ба ин ҳадаф, истифодабарии шарбат аз нуриҳои органикӣ якҷоя бо обёрикунӣ низ аз тавсияҳои муҳимест, ки дар ин заминҳо амалӣ мегардад.

   Пахта дар ҳақиқат ҳамчун боигарии асосии кишвар маҳсуб мешавад. Аз ин рӯ, солҳои охир ҷиҳати афзун намудани истеҳсолоти он аз ҷониби давлат ва Ҳукумати кишвар ба ин соҳа таваҷҷуҳи бештар дода мешавад. Дастгирии пайвастаи соҳаи пахтакорӣ на танҳо ба амнияти озуқаворӣ ва рушди иқтисодиёти кишвар мусоидат мекунад, балки барои ҳазорон нафар кишоварзон ва аъзоёни оилаҳои онҳо манбаи даромад ба ҳисоб меравад.

   Муовини раиси ноҳия Абдуаҳад Ҳакимзода дар ҷараёни боздид ба кишоварзон тавсияҳо дода, иброз дошт, ки мақомоти иҷроияи ҳокимияти давлатии ноҳия ҳамеша ҷонибдори пешрафти ин соҳаи муҳим буда, барои ҳалли мушкилоти мавҷуда тадбирҳои зарурӣ меандешанд.

    Бояд тазаккур дод, ки ин гуна боздидҳо ва таваҷҷуҳи масъулин ба раванди корҳои саҳроӣ на танҳо рӯҳияи кишоварзонро болида мегардонад, балки онҳоро ба кӯшишҳои бештар ва истифодаи самараноки ҳар як қитъаи замин ташвиқ менамояд. Умед аст, ки бо заҳмати аҳлонаи деҳқонон ва дастгирии давлат, ҳосили имсолаи пахта фаровон хоҳад буд.

Хабарнигори “Парвозгоҳи бузургон”