*Фарзандони ту, Тоҷикистон

    Зиндагии ҳар инсон ҳамеша бо амалҳои неку рафтори наку зебу зинат касб мекунад ва ҳар ки дар иҷрои амалҳои нек мекӯшад, хизмати софдилонаро ба халқу Ватан шиори зиндагии хеш намуда, бо меҳнати ҳалолу фидокорона баҳри ободии диёр саҳм мегузорад, мардум ӯро дӯст медоранду эҳтиром мекунанд.

    Таърих дирӯзро бо имрўз ва имрўзро ба фардо мепайвандад. Таърихи ҳар халқу мамлакат дар симои шахсиятҳои маъруф, амалҳои неки фарзандони содиқаш акс меёбад, зиндагию фаъолияти ин зумра ашхос бо замони худ пайвастагии ногусастанӣ дорад. Хушбахтона, дар замони мо низ инсонҳои поктинату меҳнатдӯст, бофарҳангу ватандӯст кам нестанд, ки туфайли амалҳои неки онҳо дунё побарҷосту зебост. Ин ҷо саҳифаҳои зиндагиномаи яке аз ҳамзамонони хеш, инсони дурандешу соҳибэҳтиромро варақгардон намуда, кас ба чунин хулоса меояд, ки вай дар боғи ҳаёт аз боғбони бомаҳорат тарбия гирифта, нахли пурборе гардидааст.

    Ӯ зодаи шаҳри Хуҷанди бостонист. Дар оилаи иштирокчии Ҷанги Бузурги Ватанӣ ба олами ҳастӣ омадааст. Аз ин ҷост, ки меҳри ватандорӣ, ифтихори миллӣ ва худшиносӣ дар қалби ӯ аз айёми кӯдакӣ ҷӯш мезанад. Панду андарзи модари тарбиятгар ва омӯзгорони хирадмандаш роҳнамои зиндагиаш гардиданду пас аз хатми муассисаи таҳсилоти миёнаи №11-уми шаҳри Хуҷанд таҳсилашро дар Донишкадаи омӯзгории Ленинобод ба номи С.М.Киров ( имрӯза ДДХ ба номи академик Бобоҷон Ғафуров ) идома дода, чун донишҷӯи фаъолу ташкилотчӣ шинохта шуд.

   Фаъолияти меҳнатиашро ҳанӯз пеш аз таҳсил дар мактаби олӣ дар фабрикаи бофандагии Комбинати абрешими шаҳри Хуҷанд оғоз намуда, бо дипломи донишкада боз ба истеҳсолот пайваст. Дар заводи таҷҳизоти пастшиддати шаҳраки Адрасмон устои бахш буду дар як вақт котиби ташкилоти комсомолии коргоҳро ба зимма дошт. Пас аз чанде ӯ қарзи фарзандиашро дар шаҳри Волгоград назди Ватан – Модар адо намуд.

Пас хизмати ҳарбӣ дар Комбинати қолинбофии шаҳри Қайроққум дар вазифаҳои устои таъмири таҷҳизот, котиби кумитаи комсомолии иттиҳодия фаъолият кард.

  Ҷаббор Ҷалолович Аҳмадов аз соли 1980 пурра ба кори комсомолию ҳизбӣ гузашта, инстуктор, баъдтар мудири шуъбаи ташвиқот ва корҳои мадании кумитаи комсомолии вилоят, мушовири Хонаи маорифи сиёсии кумитаи вилоятии ҳизб, инструктори шуъбаи идеологии кумитаи ҳизби вилоят буд. Дар мактаби олии ҳизбии шаҳри Мински Ҷумҳурии Белорусия таҳсил намуда, савияи дониши сиёсии хешро баланд бардошт.  Боз ба зодгоҳаш баргашта, ташкилотчии масъули кумитаи вилоятии ҳизбӣ, чанд муддат мушовири раиси Кумиҷроияи шаҳр, мудири шуъбаи иҷтимоию маданӣ, робита бо ташкилотҳои ҷамъиятию сиёсӣ ва байналмилалии Комиҷроияи маркази вилоят фаъолият бурд.

Ҳамин тавр, ӯ зина ба зина боло рафт. Ба вазифаи пурмасъулият – муовини раиси шаҳри Хуҷанд таъинаш намуданд ва дар ин вазифа бо қобилияти баланди роҳбарӣ кор кард. Сипас, ба ӯ бовар намуда, дар  Мақомоти иҷроияи ҳокимияти давлатии вилояти Суғд  вазифаҳои роҳбари Маркази матбуоти Ҳукумати вилоят ва муовини раиси вилоятро дар самти идеологӣ  ба зиммааш гузоштанд, ки бо ҳисси баланди масъулиятшиносӣ фаъолият кард.

Хизматҳои арзанда, омӯзиши пайваста, азму талош, фидокорӣ, ҳалимӣ, хоксорию инсондӯстӣ, меҳрубониву  масъулиятшиносӣ, кордонӣ, муваффақиятҳои шоиста дар назди халқу Ватан  ӯро муҳтарам гардонида, номашро вирди забонҳо кардааст.

Вай чун тарбиятгари Ҳизби коммунист содиқонаю софдилона барои рушди ҷомеа хизмат намуд, сафи онро тарк накард. Коммунистони вилояти Суғд моҳи марти соли 2000 - ум ӯро сарвари аввали худ интихоб намуданд. Дар маҷлисҳои бюро, пленум ва конфронсҳои ҳизб дилсӯзона баҳри ҳалли ин ё он мушкилот ҳарф мезад ва талаб мекард, ки намояндагони ҳизби коммунист дар пешрафти ҷомеа, ободии диёр мавқеъ дошта бошанду ба манфиатҳои халқ хизмат намоянд. 

Оре, худи вай зинаҳои гуногун ва пурмасъулияти фаъолиятро паси сар намуда, то ба дараҷаи вакили Маҷлиси намояндагони Маҷлиси Олии Ҷумҳурии Тоҷикистон расид ва тамоми истеъдоду қобилият донишу маҳораташро танҳо ба манфиати мардум равона сохт, розу ниёзи мардум, дарди дили дардошнояш буд.

     Интихобкунандагон аз ҳавзаи интихоботии “Саидхоҷа Ӯрунхоҷаев,№15” ду навбат ( даъвати 4-5) сокинони Ҷамоатҳои деҳоти Унҷӣ, Ҳайдар Усмонов, “Чашмасор”-и ноҳияи Бобоҷон Ғафуров ва шаҳри Бӯстон котиби аввали Кумитаи вилоятии Ҳизби Коммунисти Тоҷикистон, ҷавонмарди хушзеҳну боирода Абдуҷаббор Аҳмадовро чун вакили хеш дар Маҷлиси намояндагони Маҷлиси Олии Ҷумҳурии Тоҷикистон интихоб намуда, бурд намуданд. Вакили мардумӣ ҳамеша саъй меварзид, ки ба боварии интихобкунандагон сазовор бошад, барои адои дархости мардум бо ҳисси баланди масъулият кӯшиш ба кор мебурд, бо интихобкунандагонаш вохӯриҳои рӯ ба рӯ доир менамуд.

    Зимни суҳбат сардухтури вақти Беморхонаи ноҳиявии №3-и Ҷамоати деҳоти ба номи Ҳайдар Усмонов Абдурауф Муллобоев изҳор дошт: ” Бо дахолати вакили мардумӣ Абдуҷаббор Аҳмадов сохтмони бинои нави бемористони деҳот ба нақша ворид гардида, соли 2019, дар рӯзҳои таҷлили Наврӯзи байналмилал бо иштироки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон он мавриди истифода қарор гирифт. Имрӯз кормандони соҳаи тандурустии деҳот дар бинои наву замонавӣ, муҷаҳҳаз бо таҷҳизоти муосир фаъолияти босамар доранд. Орзуи банда ва сокинон ҷомаи амал пӯшид, сатҳу сифати хизматрасонӣ хеле боло рафт...”

    Ин инсони накуном агар гӯям, ки ба муаллифи ин сатрҳо ҳаққи устодӣ дорад, шояд хато набошад. Солҳои дар Мақомоти иҷроияи ҳокимияти давлатии шаҳри Хуҷанд фаъолият бурдан бароям ифтихор ва мактаби бузурги омӯзиш буд. Камина дар шуъбаи фарҳанг ва иттилоот чун сармутахассиси соҳа,  котиби матбуотии раиси шаҳрро ба зимма доштам. Устод Абдуҷаббор Аҳмадов дар вазифаи муовини раиси шаҳр самти идеологиро сарпарастӣ мекард. Вазифаашро хуб медонисту бо ҳисси баланди масъулияту кордонӣ онро иҷро мекард,  Барои пешрафти кор ва иҷрои саривақтии он дар машваратҳои корӣ аввал муваффақияти ҳар кормандро гуфта, сипас аз камбудӣ сухан мекард ва барои бартараф намудани он бо муомилаи хуш ва ҷиддияти хос маслиҳатҳои судманд медод. Таъкид мекард, ки масъулиятшиносӣ омили  иҷрои саривақтии супориш ва пешрафти  ҳама кор аст. Гумон мекунам, ин аз беҳтарин рафтори ҳар роҳбари кордону дурандеш мебошад.

     Бароям муъҷиби сарфарозӣ ва ифтихор аст, чун шахси боэътимод назди интихобкунандагон ӯро чун номзади арзанда ба вакилии Маҷлиси намояндагони Маҷлиси Олии Ҷумҳурии Тоҷикистон муаррифӣ намудаам.  Давоми фаъолияти ду даъвати вакилиаш ӯ тавонист, ба иҷрои даҳҳо дархости интихобкунандагон ва татбиқи амалии барномаи пешазинтихоботиаш муваффақ гардад. Солҳо мегузаранд, замонаҳо дигар мешаванд, вале кори неку номи нек дар ёду хотирҳои мардум ҷовидон боқӣ мемонанд. Ин чанд сатри самимӣ меҳрномаест, ба инсони соҳибдилу соҳибзаковат, фозилу донишманд, кордону ташаббускор, Корманди шоистаи Тоҷикистон, дорандаи якчанд мукофотҳои давлатӣ Абдуҷаббор Аҳмадов, ки бо донишу маънавияти воло, заковати беҳамто, фаъолияти вусъатбору сазовор миёни аҳли ҷомеа маъруфият пайдо намуда,  соҳибэҳтиром гардидааст.

    Дар ин айёми фараҳафзо – арафаи таҷлили ҷашни мубораку муқаддаси миллӣ – 34 -умин солгарди Истиқлоли давлатии Ҷумҳурии Тоҷикистон инсони соҳибфазл, ходими намоёни давлатию ҷамъиятӣ, аз чеҳраҳои дурахшони арсаи сиёсат, маърифат ва Парлумони кишвар Ҷаббор Ҷалолович Аҳмадов ба синни мубораки 70-солагӣ мерасад. Дар ин рӯзҳои пурнишот ва ҳама рӯз барояш саломатӣ, нусрату шодӣ, сарбаландӣ ва давлати бегазанди пирӣ  таманно дорем.

   Ҳар ки бо меҳру вафо бар халқ хизмат мекунад,

    Номи худро сархати девони миллат мекунад

Мавлуда ҲОҶИБОЕВА,

узви Иттифоқи журналистони Тоҷикистон,

• Next