29 март Президенти Ҷумҳурии Тоҷикистон, Пешвои миллат  муҳтарам Эмомалӣ Раҳмон дар ноҳияи Бобоҷон Ғафуров ба фаъолияти Корхонаи истеҳсоли равғани  Ҷамъияти саҳҳомии пӯшидаи  Зуҳал оғоз бахшиданд.

Иншоот дар доираи татбиқи ҳадафи чоруми миллӣ - саноатикунонии босуръати мамлакат бунёд гардида, иқтидори лоиҳавии он дар як шабонарӯз 40 тонна равғани растанӣ мебошад.

Дар корхона 40 сокини маҳаллӣ бо кор ва маоши хуб таъмин гардид.

Хатти истеҳсолӣ аз дегҳои бухорӣ, сехи равғантозакунӣ, омода намудани қуттиҳои пластикӣ ва бандубаст иборат буда, маҳсулот дар зарфҳои аз як то панҷлитра вориди бозори истеъмолӣ мешавад.

Корхона бо мақсади таъмини талаботи сокинон бо маҳсулоти ватанӣ ва дорои сифати баланд таъсис ёфта, дар он аз рапс, офтобпараст, сиёҳдона ва чигит равған истеҳсол мешавад.

Ба таъкиди мутахассисони соҳа, ба кор оғоз намудани корхона метавонад, ҳамчунин, ба коҳиши воридоти хӯроки паранда аз хориҷи  кишвар мусоидат намояд, зеро кунҷораи истеҳсолшуда, ки дар таркибаш беш аз 6 фоиз равған дорад ба фабрикаҳои парандапарварӣ бо нархи нистбатан арзон пешниҳод карда мешавад.

 Пешвои миллат муҳтарам Эмомалӣ Раҳмон ба масъулин барои афзун намудани ҳаҷми маҳсулот, таъсиси ҷойҳои нави корӣ ва таъмини бозори дохилӣ бо равғани растанӣ тавсияҳои муфид доданд.

Бо таъсиси чунин корхонаҳо имконияти қонеъ намудани талаботи аҳолӣ бо ин навъи маҳсулот бештар шуда, соҳибкорон метавонанд бо истифода аз имтиёзҳои Ҳукумати кишвар истеҳсолоти ватаниро тақвият бахшанд.

Дар ҳамин ҷо Сарвари давлат бо маҳсулоти корхона шинос шуданд. Иттилоъ дода шуд, ки равғани ин корхона дорои сифати баланд буда, аз лиҳози экологӣ тоза ва безарар мебошад.

Сарвари давлат иқдоми созандаи соҳибкори ватаниро шоистаи таҳсин хонда, таъкид доштанд, ки бунёди чунин  иншоот ба сатҳи некуаҳволии мардум мусоидат менамояд.

Ҳоло дар шаҳру ноҳияҳои вилояти Суғд, асосан, корхонаҳои азими коркарди пахта ва маҳсулоти ширӣ, гӯштӣ, қаннодӣ, консерваи меваю сабзавот, равғани растанӣ, ранг, мебел, риштаи абрешимӣ, атлас, гӯшти мурғ ва ғайра фаъолият доранд, ки молу маҳсулоташон ба давлатҳои ҳамсоя ва даҳҳо кишварҳои дигар содирот мешавад.

Манбаъ: www.president.tj

  29 март сафари кории Президенти Ҷумҳурии Тоҷикистон, Пешвои миллат муҳатарам Эмомалӣ Раҳмон дар вилояти Суғд аз деҳоти Овчиқалъачаи ноҳияи Бобоҷон Ғафуров оғоз гардид.

Дар деҳоти Овчиқалъача Сарвари давлат ба хотири сарсабзӣ ва фаровонҳосилӣ дар боғи интенсивии филиали Институти боғу токпарварӣ ва сабзавоткории Академияи илмҳои кишоварзии Тоҷикистон дар вилояти Суғд ниҳоли дарахтони мевадиҳанда шинонида, мардуми ноҳия ва олимону кормандони соҳаи кишоварзиро ба вусъат бахшидани амалҳои сабзу хуррамгардонӣ ҳидоят намуданд.

Боғи интенсивӣ дар маҷмуъ 20 гектарро ташкил дода, асосан дар ҷойи боғоти куҳнаи зардолу, ки бо гузашти бештар аз 30 сол аз самар боз монда буд, бунёд карда шуд. Аз ин нишондиҳанда 10 гектарро боғи себу гелос, 10 гектари дигарро боғи шафтолу ташкил медиҳад. Дар боғи навбунёд бо мақсади таъмини сабзиши ноҳолҳо обмонии қатрагӣ ба роҳ монда шудааст.

Зимни суҳбат бо олимону хоҷагидорон ва дигар кормандони соҳаи кишоварзӣ таъкид гардид, ки ҳангоми бунёди боғот ба дурустии интихоби мавзеъ барои парвариши ниҳол ва зиёд намудани масоҳати боғҳои ҳосилаш ба содирот нигаронидашуда таваҷҷуҳи бештар зоҳир карда шавад.

Тибқи маълумот, филиал дорои 564 гектар замини кишоварзӣ буда, наздики 400 гектар боғ ва зиёда аз 80 гектар токзор маҳсули кори чандинсолаи олимони ин муассисаи илмӣ мебошад.

Олимону кормандони филилаи Институти боғу токпарварӣ ва сабзавоткории Академияи илмҳои кишоварзии Тоҷикистон дар вилояти Суғд соли 2014 низ дар масоҳати 4 гектар боғи интенсивӣ бунёд карда буданд. Боқимонда боғу токзори анъанавӣ буда, ҷиҳати дар истеҳсолот татбиқ намудани дастовардҳои илмӣ ва таҷрибаи пешқадам натиҷаҳо назаррасанд.

Бино ба таъкиди олимон, боғҳои интенсивӣ назар ба боғҳои анъанавӣ аз лиҳози иқтисодӣ бештар манфиатовар буда, дар мамлакат солҳост, ки таҷриба шудааст ва дар зарфи се-чор сол ба ҳосил медароянд.

Замини байни қатори боғот низ самараноку оқилона истифода мегардад. Яъне то давраи калон шудани ниҳоли дарахтон дар байни қатори он зироати гуногуни кишоварзӣ кишту парвариш карда мешавад.

Дар соли аввал олимони филиали Институти боғу токпарварӣ ва сабзавоткории Академияи илмҳои кишоварзии Тоҷикистон дар вилояти Суғд дар байни қаторҳои боғи нави интенсивӣ дар масоҳати 6 гектар пиёз, 4 гектар сабзӣ ва зери плёнка 2 гектар тарбуз кишт намуданд. Ҳамзамон дар масоҳати хурд барои таҷриба пиёзи анзур парвариш карда мешавад. Барои гирифтани тухмии сабзӣ ва помидори серҳосил низ дар қитъаҳои алоҳида ин ду навъи зироат кишт карда шудааст. Аз давраи кишт то ҷамъоварии ҳосил хусусиятҳои зироат пурра омӯхта мешавад.

Олимони филиал дар самтҳои афзалиятноки соҳаи кишоварзӣ, аз ҷумла боғдорию токпарварӣ, сабзавоткорӣ ва парвариши картошка фаъолияти илмию таҳқиқотиро тақвият мебахшанд.

Иттилоъ дода шуд, ки то ин муддат филиали Институти боғу токпарварӣ ва сабзавоткории Академияи илмҳои кишоварзии Тоҷикистон дар вилояти Суғд барои офаридани 8 навъи зардолу, як навъи сабзӣ ва як навъи ангур соҳиби 12 шаҳодатномаи муаллифӣ шудааст. Ҳамзамон ду навъи зардолу, 3 навъи ангур, ду навъи пиёзи анзур ва як навъи пиёз, ки аз ҷониби олимони филиал офарида шудааст, мавриди озмоиш қарор дорад.

Сарвари давлат муҳтарам Эмомалӣ Раҳмон зимни шиносоӣ бо зарфиятҳои аграрии ин мавзеъ, ташаббуси масъулони Академияи илмҳои кишоварзии Тоҷикистонро оид ба барқарорсозии боғҳои куҳна муҳиму саривақтӣ маънидод карданд.

Мавриди зикр аст, ки ҳамасола дар вилояти Суғд дар доираи татбиқи барномаҳои давлатӣ боғу токзори нав бунёд ва бо иҷрои саривақтии тадбирҳои агротехникӣ ҳаҷми истеҳсоли мева зиёд карда мешавад.

Масоҳати умумии боғҳо дар ҳама бахшҳои хоҷагидории вилоят зиёда аз 70 ҳазор гектарро ташкил медиҳад ва аз ин нишондиҳанда наздики 60 ҳазор гектараш ҳосилдиҳанда мебошад.

Таваҷҷуҳи хоҷагидорони вилоят барои бунёди боғҳои интенсивӣ ва суперинтенсивӣ зиёд аст. Ин аст, ки аз масоҳати умумии боғҳои бунёдшуда қариб 1000 гектарро боғҳои интенсивӣ ва суперинтенсивӣ ташкил медиҳад.

Манбаъ: www.president.tj

     29 март Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маҳаллаи Боғистони ноҳияи Бобоҷон Ғафуров муассисаи таҳсилоти томактабии Баҳорро мавриди баҳрабардорӣ қарор доданд.

Бинои кӯдакистони Баҳор барои таълиму тарбияи 200 нафар пешбинӣ гардида, аз ҷониби Академияи илмҳои кишоварзии Тоҷикистон бо харҷи 4,7 миллион сомонӣ сохта, ба истифода дода шуд. Ин тадибири муҳим дар заминаи дастуру супоришҳои Сарвари давлат муҳатарам Эмомалӣ Раҳмон оид ба фарогирии бештари кӯдакон ба муассисаҳои таҳсилоти томактабӣ амалӣ гардид.

 Кӯдакистони Баҳор дар маҳаллаи Боғистони ноҳияи Бобоҷон Ғафуров нахустин муассисаи томактабӣ маҳсуб меёбад.

Зимни шоиносӣ маълум гардид, ки дар муассисаи таҳсилоти томактабии Баҳор дар 6 гурӯҳ имконияти мусоид барои таълиму тарбияи кӯдакон муҳайё буда, барои бозиву фароғат низ шароити зарурӣ фароҳам оварда шудааст.

Дар муассисаи томактабӣ барои ба таълиму тарбия фаро гирифтани кӯдакони аз 2 то 7 сола тариқи озмун 30 нафар мураббия ва парастори ботаҷрибаи соҳибмаълумот ҷалб карда шуда, таҳсил бо забони тоҷикӣ ва русӣ сурат мегирад.

Сарвари давлат муҳтарам Эмомалӣ Раҳмон зимни шиносоӣ бо шароиту имконоти мавҷудаи кӯдакистон барои дар рӯҳияи хештаншиносӣ тарбия намудани насли ояндасози кишвар дар беҳтар сохтани сатҳу сифати таълиму тарбия дар муассисаҳои таҳсилоти томактабӣ, инкишофи зеҳнии кӯдакон, забондонӣ ва дигар донишу малакаҳо ба масъулон дастуру супоришҳои мушаххас доданд.

Таваҷҷуҳи зиёд ва доимии Президенти Ҷумҳурии Тоҷикистон муҳтарам Эмомалӣ Раҳмон ба таълиму тарбияи кӯдакону наврасон боис гардид, ки дар тамоми гӯшаву канори кишвар садҳо боғчаву кӯдакистони нав сохта, мавриди истифода қарор дода шавад.

Ҳоло дар ноҳияи Бобоҷон Ғафуров 40 муассисаи таҳслоти томактабӣ амал менамояд ва фарогирии кӯдакон ба ин зинаи таҳсилот бе назардошти марказҳои инкишофи кӯдак бештар аз 20 фоизро ташкил медиҳад.

Иттилоъ дода шуд, ки дар замони соҳибистиқлолӣ бо маблағгузории Ҳукумати кишвар ва саҳмгузории соҳибкорон дар ноҳия 24 кӯдакистони наву замонавӣ мавриди баҳрбардорӣ қарор гирифта, дар муассисаҳои таҳсилоти томактабӣ шароит ва имконияти таълиму тарбия беҳтар гардидааст.

www.president.tj

    29 март Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷиҳати иштирок дар тантанаҳои ҷашни байналмилалии Наврӯз, вохӯрии сеҷонибаи Сарони давлатҳои Тоҷикистон, Узбекистон, Қирғизистон, шиносоӣ бо вазъи зиндагии мардум, рафти корҳои ободонию созандагӣ, ифтитоҳи як қатор иншооти муҳим ва мулоқоту суҳбат бо сокинон ба вилояти Суғд ташриф оварданд.

Дар Фурудгоҳи байналмилалии Хуҷанд Президенти Ҷумҳурии Тоҷикистон муҳтарам Эмомалӣ Раҳмонро раиси вилояти Суғд, дигар шахсони расмӣ ва гурӯҳи ҷавонон бо самимияти беандоза ва рӯҳияи болида истиқбол гирифтанд.

Манбаъ: www.president.tj