Исфисор

Болоравии ҳарорати ҳаво сабаби об шудани барфи баландкӯҳҳою пиряхҳо гашта, хавфи резиши санг, лағзиши тарма, омадани сел ва болоравии сатҳи об дар рӯдхонаҳоро ба вуҷуд меорад, — чунин изҳор доштааст Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон вобаста ба болоравии ҳарорати ҳаво, ки тибқи маълумоти Агентии обуҳавошиносӣ аз 24 то 31 июли соли равон дар ҷумҳурӣ дар назар дошта шудааст.

Кумитаи ҳолатҳои фавқулода ва мудофиаи гражданӣ дар ин иртибот, аз сокинон хоҳиш мекунад, ки ҳангоми ҳаракат дар роҳҳои кӯҳӣ эҳтиёткор бошанд. Ҳангоми ҳузур дар соҳили дарёҳо, каналҳо ва обанборҳо эҳтиёт намуда, кӯдаконро беназорат нагузоранд.

Ҳамчунин Кумита аз шаҳрвандон хоҳиш мекунад ба хотири риояи бехатарӣ тавсияҳои зеринро риоя намоянд:

Давоми рӯз тирезаҳои хонаатонро пӯшед, бахусус агар онҳо ба самти офтоббаро боз шаванд. Аммо шабона агар ҳарорати ҳаво паст шуда бошад, метавон тирезаҳоро боз кард, албатта, агар ин бехатар бошад.

Ҳангоми шамол додани хона кӯдаконро беназорат нагузоред.

Ҳарорати дохили хонае, ки бо ҳавополо сард карда мешавад, набояд поинтар аз +23+24 дараҷа бошад. Тобистонҳо ҳама бемориҳои шамолхӯрдагӣ бар асари истифодаи нодурусти ҳавополо, истеъмоли нӯшокиҳои ташнагишикан ва яхмосҳо рух медиҳанд.

Аз нурҳои мустақими офтоб худдорӣ кунед, кӯшиш намоед дар соя бимонед. Бахусус бо кӯдакони то сесола гардиш кардан дар кӯча тавсия дода намешавад. Аз иҷрои корҳои вазнин ҳам худдорӣ кунед.

Либосҳои тунуку сабук пӯшед, дар сар кӯлоҳ дошта бошед, чатр ва айнакҳои ҳимоя аз офтоб низ заруранд, бахусус барои касоне, ки рӯзона кор ё ҷойи дигар мераванд.

Бештар об бинӯшед. Мева истеъмол кунед, зеро онҳо манбаи аслии витаминҳои гуногунанд. Беҳтараш оби ҷӯшомадаро нӯшед, обе ки баъди ҷӯш омадан дар ҳарорати хона сард шудааст. Аз нӯшидани оби сард худдорӣ кунед, зеро ин сабаби паст шудани сатҳи сироятпазирӣ мешавад ва шумо зуд-зуд ба ҳар беморӣ гирифтор мешавед. Аз нӯшидани обҳои газдор ва обҳои ширин, ҳамчунин нӯшокиҳои спиртӣ худдорӣ намоед.

Кӯдаконро дар дохили мошинҳо танҳо нагузоред. Пеш аз он ки ба мошине, ки дар офтоб истодааст, нишинед, аввал дарҳои онро боз кунед.

Агар одами гармозадаро дидед, фавран ӯро дар соя хобонед, тавре, ки шамол ба рӯяш расад, ӯро водор созед, то қатра-қатра об бинӯшад, баданашро бо латтаи намнок пок созед. Баъзан лозим меояд нафаси сунъӣ дода шавад.

Ҳангоми истироҳат дар соҳили махзанҳои об ва оббозӣ ҳатман қоидаҳои бехатариро риоя намоед.

Одамоне, ки аз бемориҳои қалб ранҷ мебаранд, дар гармо чӣ бояд кунанд?

Ҳамеша доруҳои таъйиншударо бояд бо худ дошта бошанд.

Ҳатман он доруеро, ки барои субҳ духтур таъйин кардааст, истеъмол намоянд.

Бо худ бояд оби бегаз дошта бошанд.

Рӯймол ва ё дастпоки коғазӣ бо худ дошта бошанд, то ин ки дар вақти зарурат онро тар намуда, дасту рӯй ва пойҳоро тар карда, бо ин васила ҳарорати бадани худро муътадил нигоҳ доранд.

Дар офтоб худро насӯзонед ва кӯшиш кунед аз нурҳои сӯзони офтоб дурӣ ҷӯед.

Агар кӯча хеле гарм бошад, хуб мешавад, ки аз хона берун нашавед.

Либосҳо аз матои табиӣ пӯшед.

Рӯзона на камтар аз якуним литр об нӯшед.

Ба низоми таомҳо ва ғизои парҳезӣ гузаред, меъдаро бо ғизои вазнин пур накунед.

Хеле муҳим аст, ки шароб истеъмол нанамоед ва сигор ҳам накашед.

Дар ҳоли пеш омадани ҳолатҳои ногувор бо телефони 112; 93 8802819; 223-13-11 ба Кумитаи ҳолатҳои фавқулода хабар диҳед!

Бознашр аз саҳифаи Мақомоти иҷроияи ҳокимияти давлатии вилояти Суғд

Тибқи нақшаи тасдиқгардидаи Мақомоти иҷроияи ҳокимияти давлатии ноҳияи Бобоҷон Ғафуров ва Филлиали Иттифоқи Ҷавонони Тоҷикистон дар ноҳияи Бобоҷон Ғафуров оид ба баргузории мулоқоту суҳбатҳо дар партави эълон гардидани соли 2024 “Соли маърифати ҳуқуқӣ”, ҷиҳати баланд бардоштани маърифати ҳуқуқии шаҳрвандон, паст намудани сатҳи хурофотпарастӣ дар ҷомеа, татбиқи қонунҳои Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон», «Дар бораи масъулият дар таълиму тарбияи кӯдак», «Дар бораи тарбияи ватандӯстии шаҳрвандон» ва «Дар бораи пешгирии зӯроварӣ дар оила», «Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025», «Стратегияи давлатии муқовимат ба коррупсия дар Ҷумҳурии Тоҷикистон барои давраи то соли 2030» бо ҷалби кормандони ҷамоати шаҳраки Ғафуров мулоқот доир гардид.

Дар мулоқот Ӯғулой Ҳоҷибоева, мудири шуъбаи кор бо занон ва оилаи Мақомоти иҷроия ҳокимияти давлатии ноҳияи Бобоҷон Ғафуров, номояндагии Иттифоқи ҷавонони Тоҷикистон дар ҷамоати шаҳраки Ғафуров Фарангиз Ҷуманазарова иштирок ва суханронӣ намуданд.

Дар мулоқот вобаста ба баланд бардоштани маърифати ҳуқуқии шаҳрвандон, истифодаи дурусти фарҳанги телефонҳои мобилӣ, пешгирии шомилшавии ҷавонон ба ҳизбу ҳаракатҳои ифротгаро, роҳ надодан ба таълимоти ғайрирасмии динӣ, тақвият бахшидани ҳисси худшиносию худогоҳӣ ва ватандӯстӣ, танзими ҷашну маросим, пешгирии ҳолатҳои фавқулода ва ғайраҳо суҳбат карда шуд.

Зикр гардид, ки воқеан, терроризм ва тахрибкорӣ дар замони муосир силоҳе дар дасти қудратҳои ҷаҳонӣ гардида, бегуфтугӯ, мо аз рӯйдодҳои солҳои охир баръало мушоҳида мекунем, ки қудратҳои асосӣ тавассути истифода аз терроризми байналмилалӣ мехоҳанд ҳадафҳои геосиёсии хешро дар дилхоҳ минтақа роҳандозӣ кунанд. Бинобар ин, ин тамоюли тавсеаёфта аз ҷониби абарқудратҳо маблағгузорӣ шуда, илова бар он дар паҳншавии он саҳми қудратҳои ҷаҳонӣ ба назар мерасад.

Дар фарҷоми мулоқот байни иштирокдорону даъватшудагон суҳбати озод дар мавзӯъҳои зикршуда сурат гирифт.

ТАНЗИМИ РАСМУ ОИНҲО – КАФОЛАТИ ЗИНДАГИИ ШОИСТА

         Бо мақсади таъмини иҷрои қарори Раиси вилояти Суғд аз 04.01.2022, №01 Дар бораи гузаронидани “Рӯзи ягонаи ахбор” ва тибқи барқияномаи Мақомоти иҷроияи ҳокимияти давлатии вилояти Суғд аз 4 июли соли 2024, №367-6/13 дирӯз дар ноҳияи Бобоҷон Ғафуров Рӯзи ягонаи ахбори сиёсӣ баргузор карда шуд. Оид ба баргузории Рӯзи ягонаи ахбор тамоми ташкилоту муассисаҳо ва ҷамоатҳои шаҳрак ва деҳоти ноҳия тариқи барқияномаи ноҳиявӣ огоҳонида шуда, ҷадвали вобастакунии масъулони гурӯҳи тарғиботӣ тасдиқ гардонида шуд. Маводи тарғиботӣ оид ба мавзӯи тавсияшуда “Танзими расму оинҳо – кафолати зиндагии шоиста”, ки дар нашрияи расмии Мақомоти иҷроияи ҳокимияти давлатии ноҳия зери сарлавҳаи “Танзим – баракати зиндагист” чоп шудааст, тариқи сомонаи расмӣ ва саҳифаи фуйсбукии мақомоти иҷроияи ҳокимияти давлатии ноҳия паҳн карда шуд.

Дар ҷамъомади васеи сокинони деҳоти Хистеварз, ки дар маҷлисгоҳи Ҷамоат баргузор гардид, гурӯҳи тарғиботии мақомоти иҷроияи ҳокимияти давлатии ноҳия дар ҳайати мудири шуъбаи рушди иҷтимоӣ ва робита бо ҷомеаи дастгоҳи Раиси ноҳия – Халифаёр П., мудири шуъбаи кор бо занон ва оила – Ҳоҷибоева Ӯ., мудири бахши кор бо дин ва танзими ҷашну маросим – Темиров У., сархатиби ноҳия – Ҳомидов А. ва раиси Ҷамоати деҳоти Хистеварз – Зоҳиров М. иштирок ва суханронӣ намуданд

.

Дафтари матбуот ва иттилооти Мақомоти иҷроияи ҳокимияти давлатии ноҳияи Бобоҷон Ғафуров